BVI公司的迷思

一路以來都有很多人談論BVI公司, 又話開BVI公司hold有限公司, 又話hold物業, 但一問到佢地知唔知BVI公司係咩, 十個有九個都支吾以對。

好, 先求知, 後投資. 先來認識BVI係咩東東.

BVI（British Virgin Islands）中文名稱英屬維爾京群島，位於大西洋和加勒比海之間，面積153平方公里。是英聯邦成員國之一。英屬維爾京群島以英國普通法為依據(其商業公司法例包括德拉瓦法例部份條款)，並以當地條例配合施行。

跟住就有人會問, BVI公司同香港有限公司有咩分別? 唔好扮野啦, 其實個真正問題係: BVI公司點樣可以比香港有限公司慳稅。

先看看摘錄自坊間列舉BVI公司的部份優點: 
- BVI政府對在BVI註冊的公司，實行零稅制，故BVI公司在BVI當地無需進行稅務申報
- 無須遞交經審計之賬目
- 提供私隱保護，不需公開股東、董事身份
- 無註冊資本要求，並可在世界各地開立銀行帳戶

以上所述之優點不是我老作, 是可以作網上找到.

醒目仔可能會立刻諗到: 筍喎, 用BVI公司在香港做生意咪可以”合法避稅”. 真係發夢無咁早呀. 

因為在香港的商業活動衡量上, 最重要的不是貨品在哪裡出入口或者貨款在哪個銀行戶口收取. 最重要係生意在哪裡接洽, 在哪裡決策, 合約或發票在哪裡發出, 因為這個才是收入真正的來源. 等如現在公司在香港, 工廠設在內地, 內地生產的貨品就算直接送到海外的顧客, 香港一樣要將這些收入報稅, 因為從接洽生意, 落Order生產, 到收貨款都是香港公司負責, 所以這是屬於香港公司的收入.

所以用BVI公司在香港做生意是不可行!

其實照我所講, BVI公司即係無用, 咁又唔係, 如果完全無用就唔會依然存在啦.

其實BVI公司主要用途是作控股公司. 首先由於要獲取BVI公司的股東及董事的身份和資料是相當困難, 所以便於不想暴露身份的投資者。再者, 由於BVI公司不用做審計報告, 故用它作控股公司就可避免做consolidated financial statements.

咁用BVI公司持有物業又有無著數？

呢方面就要視乎個物業係用來收租定炒賣, 如果收租即是在香港進行商業活動, 要報稅。如用作炒賣, 則可以公司買賣形式以避開印花稅。不過現階段, 政府推出多項辣招, 實際情況是否可行, 就要自行再了解清楚先。

最後一提係近來同一位專業人士吹水, 佢話現在新成立的BVI公司很難在香港的銀行開公司戶口, 佢而家幫人開BVI前都叫個客自己去相熟銀行問清楚開唔開到Bank Account先。

我問佢點解, 佢竟然用曹sir名句答我: 木宰羊。真係比佢激死。