供養父母免稅申報

今日同朋友k食飯，傾傾下，佢話年年都交好Q多稅，冇仔女，份糧出咁多，就計足哂稅，好鬼甘。

咁我話，你唔記報世伯伯母呀，我記得佢地好似都有60架。

朋友k嘅答案令我好乸驚訝，佢話佢阿爸阿媽有幾千萬身家, 話比人聽要佢養都無人信啦。

假設阿爸阿媽好鬼有錢，不過我為表孝心，每個月都會象徵式咁俾一兩千過佢地，當係請佢地食兩餐飯。真係兩餐咋，因為佢地通常去啲好鬼高檔嘅食府，一餐都食成千銀。咁嘅situation, 朋友k可否申報供養父母免稅額？

答案係可以嘅，因為話9之你老豆係李+x定係李趙雞，總之你響課稅年度內提供唔少於$12,000供養父母就可以申報。

朋友k話而家都報左稅，講黎都哂Q氣。我就叫佢上稅局網頁download張lR6071，填完交上稅局就搞掂。

如是者，兩星期後，朋友k打電話黎吊高我，佢話佢家姐閙佢做乜無乸端端走去報阿爸阿媽個免稅額，搞到稅局出信俾家姐。

死火，我一時忘記左朋友k有個家姐添。因為根據稅例，只有一位子女可以申報同一父或母嘅免稅額。火麒麟一時大意，忘記問清楚朋友k，最後都搞番掂，不過要請朋友k食返餐姐。

有限定無限

呢個又係一個頗為熱門嘅問題，到底做生意應該開有限公司定無限公司。

如果我係俾錢你洗嗰個，我老死都想你用無限公司同我做生意或簽約，因為有咩冬瓜豆腐，除非你釘左，如果唔係我實追債追到天腳底。

簡單啲講，你唔係做乜春大生意，或者諗住試下盤生意有冇得做，咪平平地，攞張BR玩下囉。
不過如果你做個盤生意好鬼高危，借近來三叔同蛇果單野為例，你做設計嘅，你設計左件野後比其他公司告你抄襲，之後仲要輸埋，如果你唔夠錢賠，你可以摺左間有限，拍拍屁股走人，但係如果你係無限，咁就恭喜你喇。

照火麒麟咁講，用有限公司做生意咁so，爭人錢可以唔駛還，咁點解仲有人問應該用有限定無限做生意。

查實咪又係成本問題囉，無限公司每年成本係張BR費用，而有限公司就除左張BR,仲有公司秘書，核數，計埋至少每年都要8k-10k。

所以你問火麒麟用邊隻好，不如你問我你個仔食乜Q奶粉仲容易答。

公司稅務Q&A

我成日響啲討論區見到啲人問關於個人或者公司嘅稅務問題，其實有啲問題真係花丁丁時間去稅局網頁睇下就搵到答案。其實我都明, 稅局寫個D野, 有時個個字都識, 但係就唔明佢講咩.

有時我都會回下，不過回得多都覺煩，所以試下寫個blog, 睇下可唔可以幫下手啦。

今次整幾條簡單嘅Q&A當係見面禮先啦。Q : 有限公司成立後，會幾時收到第一份利得稅報稅表?A : 公司成立18個月後就會收到.

Q : 收到第一份利得稅報稅表後, 應該要點做?

A : 梗係第一時間搵我啦!(講笑) 應該即刻搵個執業會計師做你稅務代表幫你間公司申請延期, 如果唔係, 就要響報稅表上的發出日後一個月內交審計報告。第一份可以有三個月期限。不過如果真係唔知點搵一個可靠o既執業會計師, 就搵我介紹啦.

Q : 完成左審計, 交埋審計報告上稅局之後, D文件係唔係可以送去堆田?

A : 根據稅局要求, 公司要保存至少7年業務記錄, 如果保存不足, 即屬違法，最高可被罰款 100,000元。唔好以為吹水, 我有客人真係比稅局罰過. 你可能會話好煩, 其實好簡單, 假設你一年o既文件有一大箱, 個箱面寫低年份, 同埋第幾年, 寫到第八年, 就可以送第一年個箱去堆田.

點解我會寫呢個blog?

火麒麟今年30有4，回想當年F.6之後，飛左去楓業國遊學3年幾，最終都係冇攞個degree就死返香港，當年仍是一名死𡃁仔嘅我，冇人生目標，有嘅只係一個個白日夢，老實講，而家諗返轉頭，都幾憎自己。

之後經人介紹入左間會計師樓做audit, 個時都唔Q知乜叫audit, 只係知個manager講一堆唔知咩，我心諗，佢講咁多做乜鬼吖，你老闆係咪都請我架啦。

冇錯，當年嘅我就係咁仆街，咁招積，其實到而家都係咁，不過圓滑左，但係招積得黎冇咁仆街囉。

由入呢間會計師樓到今時今日嘅經歷真係豐富而多變。火麒麟今年34歲，仍然係一樹無成，不過都想記低呢10左右嘅事業同思想上嘅轉變。

另外當然希望透過呢度分享一下自己半專業嘅知識，俾自己出來創業嘅朋友有個參考嘅地方，因為我都創過業，知道創業嘅路嘅孤獨同埋艱苦。

火麒麟自己都不停有建立新生意嘅諗法，不過已有2樣生意加1份正職嘅我，已經忙到死下死下喇，有時候有個念頭咪同人share下，睇下有冇得做，有人攞條橋做，掂左係你叻仔，10人做同一樣野都有人掂有人衰，况且街外錢，1個人邊搵得哂呀，除非你係姓李啦。